دي مصر يا عبلة

يقال إن87%من الشعب المصرى ساخطون على الحكومة المصرية ... ما تعليقك ؟
ــ ال 13% الباقيين معاهم جنسيات أخرى .

تقرير :45% من الشعب المصرى مصابون بمرض السكر ما تعليقك ؟
ــ آدى اللى خدناه من" الحلوانى " اللى بنى مصر .

ما أهم مظاهر الفهلوة عند المصريين ؟
ــ انهم يشكون فى الشحات ولا يشكون فى النصاب .

ليه الحزب الوطنى بيعمل اعلانات لنفسه مع ان البلد كلها بتاعته ؟
ــ زى ما شبكة الأوربت بتعمل اعلانات لنفسها على شاشة الأوربت .

ما الفرق الأهم بين مصر وأمريكا ؟
ــ الفرق الأهم ان عائد السياحة من الهرم المزيف الموجود فى لاس فيجاس مئة ضعف عائد السياحة من الهرم الحقيقى .

ما أهم قاعدة موجودة فى مصر ؟ــ ان مفيش قاعدة لأى حاجة ما وجه الشبه بين السد العالى وقانون الطوارىء ؟
ــ الأثنان مصدر " للكهرباء!!!" .

لماذا يطلق المصريون على زوجاتهم لقب " الحكومة "؟
ــ لصعوبة تغييرها مهما تسببت فى كوارث .

أين يمكنك أن تلاحظ سوء نية المصريين ؟
ــ عندما يغنون للطفل البرىء بمنتهى الخبث قائلين .... يارب يا ربنا " تكبر وتبقى زينا .

ليه أكتر ناس بياخدوا مواقف معارضة جريئة هم الناس بتوع الغزل والنسيج ؟
ــ علشان بيشتغلوا فى القطن , و " القطنة ما بتكدبش " زى ماقلت مدام نظيفة.

امتى بتحس ان البلد حلوة ؟
ــ ما باحسش ان بلدنا حلوة غير لما داليدا تقول : " حلوة يا بلدى "(بغض النظر انها قالتها وانتحرت)

امتى هناكل جوافة من انتاج مزارع توشكى ؟
ــ لما نلاقى المشمش!!!!!

ما العلاقة بين عصام الحضرى وسمن روابى ؟
ــ الطعم فلاحى وتحدى .

هل لك أقارب استشهدوا فى الحرب ؟
ــ لأ عندى أقارب استشهدوا فى السلام ..... " السلام 98" . .

ما الدليل على أن مصر بلد الامان ؟
ــ الدليل ان الواحد بيتردد كتير قبل ما يدخل أى قسم شرطة .

ايه الكلمة اللى ما بتحبش تسمعها وانت فى أوضة العمليات ؟
ــ يا خسارة .

ما الفرق بين الزوجة المصرية والزوجة اللبنانية ؟
ــ 40 كيلو جرام على الأقل .

بماذا ستجيب كمصرى عند سؤالك عن عمرك فيما أفنيته بعد عمر طويل ؟
ــ أفنيته فى اشارة قصر النيل مستنيها تفتح ، وفى صلاح سالم مستنيه يتحرك ، وعلى كوبرى أكتوبر مستنى لما رئيس الوزراء يروح .


لماذا يقال عن الشعب المصرى انه شعب فوضوى ؟
ــ علشان بيكره " النظام . "

افتح قلبك

افتح قلبك للإنسان الذي...
يعطيك ولا يسال كيف او كم او لمن او لماذا او ما المقابل ..
يحمل على ظهره كل همومك ويدعو لك قبل نفسه ..
يشاركك أحلامك وطموحاتك مهما كانت بعيدة المنال او سخيفة..
يأخذ من ابتسامته ويرسمها على وجهك..
يقرا عينيك قبل لسانك ..
يصدقك بينما كل الناس تكذبك ..
يغار من الدمعة ان لامست خديك ..
يوجهك ان ضللت الطريق ..
يجعل من اذنيه ملجأ" لغضبك ومن قلبه قبرا لاحزانك ..
يخاف عليك من ان تشعر بالوحدة مع شخص اخر..
لا يجعلك محتاجا له فهو دائما الى جانبك ..
يراك عظيما وقادرا عندما ترى نفسك فاشلا ..
يقسو عليك عندما تقسو على نفسك..
فيأخذ من روحه ويزرعها في يديك ..
وفي الختام ...
افتح قلبك للذي أعطاك كل هذا ولم يخدعك

موضوع قديم قليلاً اعيد نشره للتذكرة ليس الا

الراي العام الامريكي..؟؟!!!

ضحكوا علينا وصوروا لنا المواطن الامريكى بانه الشخص الاهث وراء لقمه العيش ولا يهمه ف الحياه سوى الدولارات والطعام وانه لا يعرف الفرق بين العراق والمكسيك ويظن ان مصر من دول امريكا اللاتينيه وان (دماغه كبيره) لا تهمه السياسه فى شىء ولا يعنيه اذا كان بوش سيضرب العراق ام سيشاهد احدى مباريات البيسبول.وكنت اتهم اصدقائى فى الولايات المتحده بالمبالغه عندما يبثون شكواهم من اضطهاد رجل الشارع الامريكى فضلا عن سخافات رجال الشرطه والدوائر الحكوميه وغيرها الى ان اتضحت الحقيق واسفر الراى العام الامريكى عن وجهه الحقيقى حيث ايد اكثر من 75% منهم اجراءات بوش لحرب العراق وان نفس النسبه ترى بوش زعيما خارقا.وعندما اردت ان اصل الى جذور هذا المجتمع الغريب وجدت ضالتى فى كتاب لمؤلف امريكى هو والتر ميد وهوكتاب (the jachsonian tradition) الذى يحدد اهم الملامح الحقيقيه الراى العام الامريكى :1-انه خلال مراحل طويله من التاريخ الامريكى كان الراى العام اوقطاعات كبيره منه هوالذى يدفع السياسين لخوض الحروب ولوعلى سبيل الاستفزاز فمن البدايه لم تكن حروب الهنود الحمر بسبب عدوان الهنود الحمر بقدر ما كانت بسبب تحركات المستوطنين لتوسيع نفوذهم ورغبتهم فى استفزاز الهنود للدخول معهم فى حروب-عبر الحروب التى خاضتها امركيا كان الراىالعام قوه ضاغطه هائله تطلب من الرؤساء ضرب العدو بكل ما هو متاح من قوه وفى كل الاماكن-والمعروف تاريخيا ان الراى العام الامريكى اكثر تدينا من حلفائه فىاوروبا والمعروف ايضا ان الشعب الامريكى هو شعب تغلب عليه النزعه العسكريه ولا يتردد فى فى تاييد اعتماد اكبر ميزاينه عسكريه فى العالم وهى تعادل ميزانيات الدول الاتيه مجتمعه: اليابان الصين كوريا روسيا دول الخليج-ثقافه الجيش الامريكى هى ثقافه قتاليه قويه بالمقارنه باى جيش اخر فى اى دوله غنيه - لا يعتبر الراى العام الامريكى انه من قبيل الخطأ او الارهاب القيام بعمليات التخريب لحكومات اجنبيه او اغتيال زعماء هذه الدول -على طول التريخ الامريكى فان هذا المجتمع يستبعد تلقائيا من صفوفه وبشكل مطلق كثيرا من الامريكيين ذوى الاصول الشرق اوسطيه او المكسيكيه او الاسيويه والسود واخيرا المهاجرين ممن لا ينتسبون الى البروتستانت-ولا يعتقد الراى العام الامريكى بالضروره ان يكون هناك سبب اخلاقى واضح للحروب وهم يميلون للفصل بين الاخلاق والحرب-يعشق الشعب الامركى السلاح ويعتبره جزءا من حياته وطالما ان الحكومات الامريكيه لا تنتهك حريه ومعتقدات هذا المجتمع فلتفعل ما تشاء من اجل دفع المصالح السياسيه والاقتصاديه لشعبها وكل شىء مسموح به لتحقيق هذا الهدف-وارى ان هذا المجتمع هوالذى افرز التيارات المتطرفه التى تحكم حاليا امريكا وهى فى رايى قامت بتصميم واختيار اهداف وتدريب الكوادر التى قامت باحداث سبتمبر لانهاا استشعرت الخوف من ان غياب العدو والاسترخاء السياسى الدول قد يؤدى الى فتور روح المقاتله لدى الشعب الامريكى وتراجع دور الاله العسكريه الامريكيه فاختارت الاسلام عدوا لها بعد دراسه تاريخيه ومستقبليه وخلفيه دينيه متطرفه ورات ان فى الوقت المناسب او الزمن الموقوت لست ادعى النبوه ولكن الامارات الداله على هذه الاحتمالات كثيره ولا تقوى الذره ولا الصواريخ على وقف تيارها= ولسوف تدفع امريكا العالم باسره الى اكبر ماساه عرفها التاريخ لانهم يؤمنون بالنبوءات والخرافات ومنها armageddon (هرمجدون) تلك المعركه التى يرون فانها ستفنىالعالم فى محرقه نوويه ليقعد اليهود والامريكان (على تلها) بعد الخراب

(وهذه واحده من معتقدات الاتجاه الدينى الذى يعتنقه جورج بوش الابن )

جعلونى تافهاَ

جعلوني تافهاَ
أيادي خفيه تعبث فى الظلام – أيه قلة الأدب دى من أولها – أيادى خفيه هي من تقوم بحياكة – حلوه حياكة دى – تلك المؤامرة ضدي

مؤامرة أيه وبتاع أيه ؟ .. ياعم إنت عندك بارانويا
بارانويا أيه يا حمار ؟ .. تفهم أيه أنت فى الطب النفسى والكلام الكبير ده .. إتنيل على عينك وأسكت
أفهم أيه فى الطب النفسى ؟! .. أنا أفهم أحسن منك ومن أحمد عكاشه شخصياَ ..
يا أبنى أنا مريض نفسياَ .. إسئلنى أنا
خلاص .. خلاص ، أسكت بأه خلينى أكمل كتابه .. كنا بنقول أيه ؟ .. آآه المؤامره .. جعلونى تافهاَ
يا أبنى ماأنت طول عمرك تافه .. أيه الجديد يعنى ؟
مش قلت لك إنك حمار .. أنا عمرى ماكنت تافه .. قوللى ليه ؟
ليه يا نجم ؟
لأن التافه عمره ما عرف إنه تافه .. التافه بيبقى متكيف مع تفاهته .. معندوش مشكله .. مفيش حاجه مضيقاه .. عشان كده هو تافه
تصدق عندك حق ... ماأنت طلعت بتفهم أهه .. طيب يا سيدى مين بقى دول اللى جعلوك تافه ؟
كل حاجه فى الدنيا بتدفعنى أنى أكون تافه .. أو أتجنن .. إنت ما بتبصش حواليك ولا أيه ؟ .. إفتح الجرنان .. إفتح
إتفضل ياسيدى .. صباح التهييس .. ناس غرقت وناس طلع عين أبوهم 72 ساعه فى الميه عشان واحد معاه حصانه (عضو مجلس شورى) عايز يقبض التأمين على عبّاره شغاله بقالها 36 سنه فموت 1200 واحد ، لأ وبعد كل ده لسّه بيفاصلوا فى التعويضات

حوادث القطارات .. كل اسبوع فيه حادثه وناس تموت وناس تتحرق والحكومه تصرف تعويضات ووعود بمحاسبه المسئول محاسبه رادعه .. ووزير النقل يقدم استقالته .. ويرفضوها – الموضوع ده بيفكرنى بفؤاد المهندس فى مسرحيه سك على بناتك قاللك : "ودخلت السونا أدوّر على المأذون وكل شويه أحسس وأعتذر .. أحسس و أعتذر" .. أهي الحكومه كده

لأ وشوف الكوميديا .. ناس خايفه من أنفلونزا الطيور اللى هى مموته بتاع 100 واحد بس على مستوى العالم كله .. آل أيه .. جابوا ميه معدنيه يستحموا بيها عشان فى إشاعه طلعت إن فى وزه عيانه وقعت فى النيل فلوّثتهيا عم .. أرزااق .. رزق بتوع الميه المعدنيه .. رزق الهبل عالمجانينطيب يا سيدى أرزاق .. و شعبان عبد الرحيم .. أرزاق، و روبى .. أرزاق، و عمرو سماكه .. أرزاق، و محمدعطيه .. أرزاق

محمد عطيه .. إبن حلال .. فكرتنى .. معاد "ستار أكاديمى" ، دا "خليفه" و"مايا" النهارده نومينييزنومى- أيه يا روح خالتك ؟
نومينييز .. يعنى واحد منهم هيطلع بره

إتفضل يا سيدى .. "الله يرحم جدّك اللى كان بيركب عالحمار ويبدّل برجليه" .. أديك إنت أهه واحد من ضحايا المؤامرهإتفرج إنت بس .. هاتعجبك أوى .. أنا كنت زيّك كده فى الأول ، وبعد كده إتعودت .. فى الأول هاتستغرب ، هما ليه مأضّينها أوى كده، ولاد مع بنات 24 ساعه .. آخر سبهلله ، ومش عارف مين بتحب مين ، ومين زعلان عشان مين خرجت ، ومين هايسافر اسبوع المجر عشان يحضر حفله للفريق اللى بيحبه مكافأه ليه عشان طلع أتفه واحد الأسبوع ده ،فباقى البنات بتبوسه عشان تودّعه – على فكره أسمه فادى من فلسطين – بس .. يوميين تلاته كده وهتلاقى نفسك بتحبهم ومتأثر بيهم و مش بعيد تصوّت للواد بتاع مصر

آه وأفتح أى قناه أغانى .. هتلاقى ناس فضياااااااااااه و معاها فلوس بالعبيط .. "أمير زحلان بيمسّى على فتاه المنيره" .. " جميله العتبه تبحث عن حب صادق" .. "البرنس بيحب نوسه موووووووت" .. 24 ساعه كده .. طبعاّ بغض النظر عن محتوى الأغانى

تسيبك من الأغانى وتقول هاشوف أى حاجه تانيه ، تلاقى آبليتك "هاله شو" مستضيفه واحد معفن وعماله تتكلم معاه عن دوره العظيم فى فيلمه الأخير اللى حقق 25 مليون جنيه ، عشان هو راجل فنان و المخرج راجل فنان وسامى العدل راجل فنان والجمهور هو اللى أبن كلب حمار ودخل الفيلم وأنا اللى أبن كلب بهيم مش بفهم فى الفن و لا فى الكوره عشان كده طلعت حته مهندس حقير

والصراحه راحه يا روحى .. إنت مابتعرفش

تقفل التليفزيون وتسيبك من الجرنان والكمبيوتر اللى مهنّج وتقعد فى حالك .. كافى خيرك شرك .. تلاقى حد جاى يشتغلك
أخوك عايز يذاكر ومابيحبش حد يقعد معاه فى الأوضه عشان بيتلخم

أمك فاضيه ، وجايه تاكلك دماغك فى أى موضوع مالكش فيه .. خضار .. طبيخ .. كبرت ولازم تتجوز .. أخوك مابيتصلش .. أختك شكلها عيانه .. أى حوار - على رأى سامى سرحان فى فيلم "الناظر" :"هاتشوفك هاتشوفك" – أو أبوك يظروفك كلمتين مالهمش لازمه : "مش تدخل تذاكرلك كلمتين يمكن تنجح السنه دى" .. "مش تدورلك على شغلانه بدل ماأنت قاعد كده" .. "مش تروح تزور جوز عمتك اللى عامل عمليّه اللوز من 6 أشهر" .. "طيب إنزل هات مش عارف أيه

تضطر آسفاَ إنك تسيبلهم البيت وتنزل تتسرمح فى الشوارع .. وعندك كذا أختيار

لو معاك فلوس

تروح كافيه تافه .. تقعد مع ناس تافهه تتكلموا كلام نسوان ، وتأكل شوكلات كيك وتشيّش طبعاَ وتضيعلك كام ساعهتروح سينما .. تتفرج على الممثل العظيم اللى إنت لسّه شايفه مع هاله شوتروح ديسكو – ما بتعرفش ترقص/ مابتحبش – أقعد إتفرج على البناتممكن تجيب حشيش وتقضيها .. ممكن حريم كمان

لو مش معاك فلوس

ممكن تتبرشط على حد معاه

تقعد على قهوه حقيره .. تعمل نفس الحاجات اللى كنت هتعملها فى الكافيه بس مافيش شوكلات كيك .. ممكن كمان تلعب إستيميشين .. أحسن حاجه تضيّع الوقت
ممكن تلعب بلاى ستيشين
ممكن تتسنكح مع صاحبتك .. لو عندك

- لو ليك فى الحريم .. ممكن تجيب حريم .. لو معاك فلوس -
لو ليك فى الحريم ومالكش فى الحرام .. ممكن تأضيها حب وحركات وحكايات و "أسامه منير" .. أهه تضيع وقت برضهلو مالكش فى الحريم ولا الحرام .. يبقى إنت محترم .. كده يبقى إنت فى خطر .. تبتدى تنوّر أحمر .. فالناس بتوع الأيدى الخفيه – فاكرهم – ياكلولك دماغك
إزاى ؟

ستات ماشيه فى الشارع لابسه من غير هدوم .. – دى تغيظك أكثر – شاب سنتيح ماشى مع واحده سنتيحه ومقضينها فى الشارع
يا سيدى .. إعمل مش من هنا
( ...) شوفت .. أديك بدأت تتعود .. جعلوك تافهاّ أو
طيب ياعم .. أنا تافه و (....) ، إنت عملت أيه ؟

ولا حاجه .. جعلونى تافهاَ طيب ، ما تغيير حياتك ؟
ما بتتغيرش .. عشان تتغير لازم تقدر تتحكم فيها .. وعشان تتحكم فيها لازم تبقى حرّ .. وعشان تبقى حرّ لازم تبقى حاجه .. حاجه ومعاك فلوس
ما تبقى حاجه
مش بقوللك إنك حمار .. عشان تبقى حاجه لازم تتعلم وتشتغل .. وبعد كده تبدع
تتعلم ؟! .. فى بلدنا دى صعب .. بس إفترض إنك إتعلمت
دوّر بقى على شغل .. هييييييييييييييييه .. حللنى
إيه ده لقييت شغل ؟! .. إستنى ، إنت رايح فيين .. فيه جيش
إنت نسيت ولا أيه ؟ .. المؤامره .. ماتقولش بارانويا .. إيه عااادى جيش .. عندك جيش
إلا بالمناسبه صحيح .. هو علاء وجمال مبارك دخلوا الجيش ؟
يا عم وإنت مالك ؟
.. إنت أبوك ريّس ؟
.. إتنيل أسكت وخليك فى اللى أنت فيه
طيب .. OK.. صبّرنى يا صابر .. آدى سنه وراحت
ممكن ثلاثه .. بلاش التفائل اللى عندك ده
تلاته .. تلاته .. كلله بيعدّى
خلاص .. خلصتهم
أيه ده .. بالسرعه دى ؟
سرعه أيه ؟! .. أنا عندى 26 سنه .. مش فاكر حاجه من اللى أتعلمته .. ولسه هابتدى حياتى
خلاص دوّر على شغل تانى
أه بس المره دى .. حللنى بجد
ليه ياعم ؟
عادى يعنى .. إنت نسيت اللى إتعلمته .. وعدد السكان زاد .. يبقى عدد الطلبه زاد .. يبقى البطاله زادت .. يبقى فرص العمل قلّتلا يا عم ربّك كريم .. قادر يرزقنى
طيب .. عشان البق الحلو ده .. أديك لقيت شغل .. بمرتب كويس كمان 1500 جنيه
أيه ؟
إحمد ربنا .. إنت طايل
أيوه بسشششششششش .. إدخل إشتغل
أيوه بس الشغلانه دى مش تخصصى .. مش حبيبها .. مش
أوعى تتبطّر على النعمه .. أوعى .. إنت كنت من سطرين قاعد صايع .. قوام بقيت تقول مش و بس و تشطيب ..
بس المرتب
ماله ؟
شغال .. بس هفضل مأضّيها كده على طول ؟
.. مش هتجوز بقى ولا أيه ؟
تت-أيه ؟! .. إنت عبيط يا أبنى ولا ايه ؟ .. أيه الكلام الكبير ده
كبير أيه يا عم .. أنا اللى بقيت كبير .. أنا عندى 28 سنه وماله .. سن النضج
نضج أيه يا عم ؟! .. أنا عفّنت على الشجره
مهو جواز فى الظروف دى صعب .. المفروض تجيب شقّه ، ويبقى عندك دخل ثابت عشان تعرف تعيش
وده هيحصل إمتى بقى إن شاء الله ؟
خللى عندك أمل .. إنت مش مؤمن ولا أيه ؟
آآه .. إنت كمان هتكفرنى ؟ .. إشطه
ممكن دلوقتى تنسى موضوع الجواز ده شويّه .. قضّيها
أيوه .. أزاى يعنى ؟
حريم و حشيش .. كده يعنى .. قضّيها يا عم
كنت قضّيتها زمان لمّا هقضّيها دلوقتى .. ماينفعش
أيه ده يله ؟! .. تصدّق إنك طلعت محترم
طيب ما أنا عارف .. وبعدين ؟
مش عارف .. بس مش ملاحظ حاجه ؟
أيه ؟
إن موضوع محترم ده هو اللى مودّيك فى داهيه
أيه ده .. أنت بقيت تتكلّم زيّهم أهه
هما مين دول ؟
الأيدى الخفيه .. المؤامره .. إنت كمان طلعت شريك فى المؤامره حتى إنت ؟
أنا مين يا عم .. إنت بتكلم نفسك
أه صحيح .. أنا عمال أكلم نفسى من الصبح .. يبقى أنا شريك فى المؤامره .. زعيم العصابه .. يعنى أنا السبب فى الأخر .. طيييييب أهه .. آآآآآآآآآآآآآآآآه

ناس معرفهمش .. الظاهر جيراننا : يا عينى يا أبنى .. مات فى عز شبابه .. ولله كان كويس و أبن حلال

وحدووووووووووووووه .. يلة دنيا

صوت من بعيييييييييييييد :

الصراحه راحه يا روحى .. إنت مابتعرفش